კომპანიის თითოეული ღვინო იქმნება გაბედული, შემოქმედებითი შესრულებით. ვენახის მოვლიდან ბოთლში ჩამოსხმამდე მთელი ციკლი მუდმივად განახლებად ცოდნასა და გამოცდილებას მოითხოვს. ამ პროცესში წლიდან წლამდე კომპანიის თითოეულ წარმომადგენელს თავისი განსაკუთრებული და ფასდაუდებელი წვლილი შეაქვს. სწორედ ასეთი, ერთიანი ძალისხმევით კომპანია მუდმივად ხვეწავს და აუმჯობესებს თავის ღვინოებს.
,,ასკანელი’’ ყოველთვის ორიენტირებულია მაღალ სავაჭრო მახასიათებლებსა და კორპორატიულ პასუხისმგებლობაზე. ამიტომაც, კომპანია დიდ ყურადღებას უთმობს პერსონალის პერიოდულ გადამზადებას, ვენახების დაგეგმარებას, ჯიშების სელექციას, წარმოების გადაიარაღებას და ტექნოლოგიურ გაუმჯობესებას. ჩვენ განსაკუთრებული გულისყურით ვუდგებით გარემოს დაცვისა და სოციალური პასუხისმგებლობის საკითხებს.
ქართველი კაცისთვის ვაზის ტირილი ვენახთან ურთიერთობისას ერთერთი ყველაზე ემოციური და საკრალური მომენტია. მევენახეები, ადრე გაზაფხულზე საქმეს სწორედ ვაზის ტირილისას იწყებენ. ეს არის სავეგეტაციო პერიოდის პირველი ფაზა, როდესაც იწყება ვაზის წვენის გამოდინება. სითბოს მატებასთან ერთად დგება კვირტის გამოტანის დროც. ამ დროს აუცილებელია ახლადგამოსული კვირტების გულდასმით შეწამვლა, რათა დაცული იყვნენ პარაზიტებისა და დაავადებებისგან.
ვაზის ყოველ ჯიშს თავისი ყვავილობის დრო აქვს. ყვავილების დამტვერვისთვის 10 დღეა საჭირო. ამ პერიოდში სასიცოცხლოდ მნიშვნელოვანია მზე, ქარი და კეთილშობილი მწერების საკმარისი რაოდენობა. ათი დღის განმავლობაში ვენახებში სრულიად ჩერდება ვაზის შეწამვლის პროცესი, რომ დამტვერვაში მონაწილე მწერები არ დაზარალდნენ. ხდება ვაზის გაფურჩქვნა და ზედმეტი ყლორტების მოცილება, რათა დარჩენილმა ყლორტებმა უკეთ გაიხაროს.
ზაფხულის დასაწყისში ვენახის ტრანსფორმირების ყველაზე მნიშვნელოვანი პერიოდი დგება - ვაზის დამტვერილი ყვავილებიდან ყურძნის მარცვლები ყალიბდება. ამის შემდგომ იწყება მწვანე რთველი, იკრიფება მტევნების ნაწილი, რათა ყოველ ძირ ვაზზე ღვინისათვის საჭირო რაოდენობის ყურძენი დარჩეს. მწვანე რთველით მნიშვნელოვნად უმჯობესდება ღვინის ხარისხი.
ზაფხულის განმავლობაში მევენახეები გულისყურით აკვირდებიან დამწიფების პროცესს, რომლის დროსაც მუდმივად ხდება ვაზის შემდგომი დამუშავება და მავნებლებისგან დაცვა. მტევნების დამწიფების სწორად წარმართვისას ხდება ,,ცის გახსნა’’ ანუ, ზედმეტი ფოთლების მოშორება. მავნებლებისგან ყურძნის დასაცავად კი ვენახი რამდენჯერმე იწამლება.
რთველი, მთელი საქართველოსთვის, წლის ერთ-ერთი უმნიშვნელოვანესი პერიოდია და, ხანდახან, ერთგვარი კულტურული ფესტივალის სახესაც იღებს. ამ დროს ოჯახის წევრები, ნათესავები და მეზობლები ერთი მიზნის გარშემო იკრიბებიან, რომ აიღონ მთელი წლის მოსავალი და ყურძენი დასაწურად გაამზადონ. ტრადიციულად, ყურძნის თითოეული მტევანი ხელით იკრიფება. რთველი ზაფხულის ბოლოს ან ადრეულ შემოდგომაზე იწყება და გვიან ნოემბერში მთავრდება. ვენახები კახეთში ყველაზე ადრე იკრიფება, ყველაზე გვიან კი - დასავლეთ საქართველოში: გურიასა და რაჭა-ლეჩხუმში. ყურძენში მჟავიანობის შენარჩუნების მიზნით თეთრი ჯიშები, როგორც წესი, უფრო ადრე იკრიფება, ვიდრე - შავები. გარდა ამისა, შავყურძნიან ჯიშებს დასამწიფებლად მეტი დრო ჭირდებათ, ვიდრე თეთრებს. დაკრეფილი ყურძენი სპეციალურ ყუთებში თავსდება და დაზიანებისგან დასაცავად საწარმომდე და მარნამდე სწორედ ასე მიდის.
სანამ უშუალოდ ღვინის დაწურვა დაიწყება, აუცილებელია გადაირჩეს ჯანსაღი მტევნები. გადარჩეული ყურძნის დაწურვისთანავე მეღვინეები ღვინის თითოეული სახეობის შექმნას ინდივიდუალურად უდგებიან. საქართველოში ყველა მეღვინეს ღვინის დაწურვის საკუთარი ინდივიდუალური მიდგომა აქვს. ასეა ჩვენს შემთხვევაშიც. თეთრი ღვინოების მისაღებად, ყურძნის დაჭყლეტისთანავე კანს ვაშორებთ ყურძნის წვენს. როზე ღვინოების მისაღებად ტკბილს მცირე ხნით ვაჩერებთ დაჭყლეტილ ყურძნის კანთან ერთად. წითელ ღვინოებში ალკოჰოლურ დუღილს დურდოსთან ერთად ვახდენთ, რაც ღვინის ფერზე შესაბამისად ისახება. ალკოჰოლური დუღილის დასაწყებად ყურძნის წვენს ვუმატებთ სპეციალურად შერჩეულ საფუარს. ღვინოებში სიტკბოს კი ტემპერატურის დაწევით ვინარჩუნებთ.
ჩვენი ღვინოების დასავარგებლად განსაკუთრებული პირობებია შექმნილი. დავარგება ხდება უჟანგავი ფოლადის რეზერვუარებში (6 თვემდე), მუხის კასრებში (6-24 თვის განმავლობაში) და ბოთლში (3-6 თვით რეალიზაციამდე). დავარგების სრული ციკლის გავლის შემდგომ ღვინო ჩამოსასხმელად მზადდება. ჩამოსხმა საწარმოში განსაკუთრებულად შექმნილი პირობებითა და ულტრათანამედროვე აღჭურვლობით ხდება.
.png)
